LAOAG CITY – Mairekreklamo ti maysa a mangisursuro iti Malaguip Integrated School iti ili ti Paoay gapu ta maipagarup nga agpakontribusion ken agpamulta kadagiti nagannak.
Segun ken ni Mr. Reynelio Savellano, Principal iti nasao a pagadalan, nakasaritanan ti maseknan a mangisursuro a ni Mrs. Lina Ramil a maysa a Grade 1 Teacher.
Nupay kasta, saanna pay nga inbuksilan dagiti dadduma a banag a nagsaritaanda.
Inlawlawagna a kalikagumna pay a kasarita dagiti nagannak dagiti ubbing tapno mapagsasaritaan daytoy a naimbag.
Inpasingkedna a saan daytoy nga umannugot iti ar-aramiden ti nasao a mangisursuro no bilang mapaneknekan nga adda ti kinapudnona ti maibatbato nga alegasion kenkuana.
Kabayatanna, naammoan a basar iti agrekreklamo a nagannak ket dumanon iti 500 a pisos ti kontribusion iti tunggal nagannak para iti panaggatang ti tiles idinto a ti 100 a pisos ket multa kadagiti saan a mapan agdalos.
