LAOAG CITY – Inkompara ni Mrs. Grace Santiago iti Sta. Rosa National High School iti Sarrat, Ilocos Norte ti wagas ti panagisuro da iti agdama ken idi isuda pay laeng ti agad-adal.
Iti eksklusibo nga interview ti Bombo Radyo Laoag ken ni Santiago, inbatad na a gapu ta nadur-asen ti teknolohiya ket nanayunan dagiti katulungan da nga agisuro kadagiti adalan da babaen kadagiti gadgets ken internet.
Inbatad na a babaen iti teknolohiya ket makaaramiden dagiti estudyante Video presentation kas sagot da kadakuada a mangisursuro iti selebrasyon ti Teachers’ day.
Malaksid ti video presentation ket kabaelan payen ti agaramid ti card dagiti estudyante nga isagot da kadakuada.
Kuna na a dakkel a banag kadakuada daytoy ken ibilang da a napateg a regalo manipod kadagiti estudyante da.
Nupay kasta, inbalakad na a limitaran koma dagiti estudyante ti panagusar da kadagiti gadgets gapu ta adon dagiti saanda a maar-aramid gapu iti daytoy.
Innayon na nga iti pay obserbasyon na ket uray agkukuyog ti maysa a pamilya ket awan serbina gapu ta nakatutuk ti atensyon ti tunggal maysa iti cellphone wenno aniaman a gadget da.
Kunana ni Santiago nga imbes a tumulong iti balay dagiti estudyante no makaawid da manipod pagadalan ket ad-adda pay laeng a ti cellphone ti sangwen da.
Kabayatanna, inpanakkel ni Santiago nga uray awan pay dagiti gadgets ken saan pay a nadur-as ti teknolohiya idi isuda ti agad-adal ket nagun-od da latta ti arapaap da gapu nalalaing dagiti mangisursuro iti un-unana a panawen.
Iti sabali a bangir, kinablaawan ni Santiago dagiti pada na a mangisursuro iti selebrasyon ti Teachers’ Day kagiddan ti panagpanawagan na nga itultuloy da ti agserbi, mangisuro ken mangipakita ti ayat para iti idudur-as dagiti isuro da.
