LAOAG CITY – Naakusaran ti maysa a mangisursuro iti sekondarya a namagsasao ti dakes a sarita kadagiti agay-ayam iti basketball court ken tinungpa na pay ti maysa kadagitoy iti Barangay 33-B, Lapaz ditoy ciudad ti Laoag.
Iti eksklusibo nga interview ti Bombo Radyo Laoag iti maipagarop a natungpa a ni Mr. Josie Obispo Jr., agtawen ti 18, kabayatan nga agay-ayam da ti basketball ket lumabas ti mangisursuro a ni Mr. Richard Hapa.
Inlawlawag na a kabayatan ti panagishoot na ket timmaltag ti bola a napan ken ni Hapa, ket ditoy metten a inriyaw dagiti kakadwa na nga agay-ayam ti “ney ni sir”.
Nupay kasta, maipagarop a sabali ti nagsaadan ti inaramid dagiti kakadwa na iti mangisursuro ket sinaggaysa na a pinagsasawa dagitoy.
Innayon na nga idi naipatang kenkuana ket maipagarop a tinungpa na pay daytoy.
Kuna pay ni Obispo nga uray ti kabsat nga ubing a babai ti maysa a kadwa da ket pinagsasawan ni Hapa isut gapuna a nagsangsangit ti maseknan.
Nagturong ti Bombo Radyo iti balay ti mangisursuro tapno alaen ti kabibiangan na maipanggep iti daytoy nga isyu ngem saan nga inpalubos ti pamilya na nga agpainterview.
Inpetteng ti pamilya ni Hapa nga iti laengen uneg ti barangay da ti pagsasaritaan da maipanggep iti napasamak.
