LAOAG CITY – Nagreklamo ti agnagan ti Troy, iti ili ti San Nicolas kontra iti maysa a mangisursuro a nagrenta ti lugan.
Daytoy ket maipagarup nga insalda ti mangisursuro ti inupaan na a lugan.
Inlawlawag ti nagreklamo iti mangisursuro a binigbig na a ni Vladimir Pascual Magayano iti Plaridel Elementary School, iti Brgy 28 ditoy siudad ti Laoag a saan nga agparparenta iti lugan ngem nagpakaasi daytoy.
Kuna na a ti nagbalin a palawag kenkuana ti mangisursuro ket usaren na ti lugan a mapan kadagiti pada na a mangisursuro nga agaramid ti module.
Inbatad na a gapu ti asi na ken agserbi kadagiti agad-adal ket inpabulod na ti maysa a lugan a mausar iti dua nga aldaw.
Ibunannag ni Troy a ti tulagan da ket mapan laeng iti ili ti Pasuquin rason a minimal ti bayad ti pannakabulod na.
Kabayatanna, nakita ti nagreklamo ti lugan na a tartarimaanen dagiti dua a lallaki iti Suba road ditoy siudad ti Laoag iti kabigatan na.
Gapu iti daytoy nakiuman kadagiti maseknan tapno ammuen na iti napasamak ket naduktalan na a naggapu iti ili ti Pagudpud ti lugan na.
Iti maikadua nga aldaw, kinasarita ti nagreklamo ti mangisursuro nga isubli nan ti lugan na ngem agingga itay napalabas a Domingo.
Nagreport da iti PNP tapno marekobre da ti lugan agingga a nadanun da iti ili ti Paoay a naperdian ti mangisursuro.
Napagsasaritaan nga adda ti laptop a naited iti nagreklamo kas pangtengngelan na tapno agbayad ni Magayano iti 25 a ribo a pisos nga upa agramanen dagiti nadadael iti lugan.
Nawayawayaan ti mangisursuro kalpasan ti panagsasarita da iti PNP.
Kabayatanna, inbunannag ti nagreklamo a timmawag kenkuana ti maysa nga aggatgatang ken aglaklako ti lugan ken nagsaludsod seknan iti mangisursuro.
Ditoyen a naamuan ni Troy a nakasalda ti starex a lugan na.
Inlawlawag na nangrenta ti mangisursuro iti sabali a kotse iti sabali a tao nga isu ti insukat na iti nangisaldaan na ti starex van ti nagreklamo tapno maisubli na daytoy.
Innayon ni Troy a no saan a matungpal ni Magayano dagiti napagsasaritaan seknan iti panagbayad ket maiyuli ti kaso kontra kenkuana.
iti sabali a bangir, inlawlawag ni Mr. Vladimir Magayano, a naakusaran a nangisalda iti rinentaan na a lugan iti ili ti San Nicolas, a saan na a mudos ti napasamak ngem ketdi agkasapulan ti kuarta para iti personal a rason.
Kuna na a sidadaan nga agbayad iti maseknan intono Biernes ken Lunes kas resulta iti nagsasaritaan da iti PNP Paoay.
Inadmitir ni Magayano a pudno nga inupaan na ti lugan ti nagreklamo a mapan iti ili ti Pasuquin, tapno tumulong kadagiti pada na a mangisursuro nga agaramid ti module.
Gapu ta kasapulan na ti kuarta ket naisalda na ti lugan ti nagreklamo.
Inbatad na a gapu ta maipiten ket nangrenta iti sabali a lugan nga isu iti insukat na iti insalda na nga starex van gapu ta al-alaenen ni Troy a taga ili ti San Nicolas.
Rumrumwar a naisalda na ti lugan kalpasan iti dua nga aldaw a pannakausar na a nagtulagan da.
Naamuan pay ti Bombo Radyo manipud kenni Troy a kuna dagiti kabsat ti mangisursuro a maipagarup a problema da iti nasao nga aramid na.
