LAOAG CITY – Nakaam-ames ti pannakatay ti maysa a mangisursuro kalpasan a pinaltugan ti mismo nga estudyante na iti uneg ti campus ti Balabagan Trade School iti Barangay Narra, Balabagan, Lanao del Sur.
Basar kadagiti otoridad, namonganay iti pammltog iti biktima a ni Danilo Barba, agtawen ti 34 kalpasan nga inbagsak na iti maysa a subject ni alyas Kaizer, agtawen ti 20 ken Grade 11 student.
Inbatad iti Balabagan Municipal Police Station nga inadmitir a mismo ti suspek ti krimen gapu iti nakaro a gurana iti mangisursuro a nangibagsak kenkuana.
Iti imbestigasyon, pasado alas-8:00 ti bigat idi August 4, 2025 a napasamak ti insidente.
Sumrek koma iti campus ni Barba idi sinaed ti suspek ken pinaltugan na ti ulona usar ti maysa a kalibre .45 a pistol, a nagresulta ti pannakatay na a dagus.
Naamoan a kalpasan ti krimen ken napan naglemmeng ti suspek kadagiti kabagyan da iti Marogong.
Nupay kasta, babaen ti tulong ti kabsat na a maysa a pulis ket boluntaryo a simmuko kadagiti otoridad iti kabigatan na.
Rumrumuar a saan laeng a ti biktima ti nangibagsak iti suspek no di ket adda pay ti dadduma a mangisursuro a possible a target na, ngem inlawlawag ni alyas Kaizer a ni laeng Barba ti kagurana.
Iti agdama, addan dagiti naiwaras a pulis ken soldado tapno tumulong nga agbantay iti nasao a pagadalan.
