LAOAG CITY – Rinaot ti maysa a mangisursuro ti pada na met laeng a mangisursuro iti Sentral Elementary School idiay Vintar, Ilocos Norte.
Daytoy ti kinumpirmaran a mismo ti principal iti nasao a pagadalan a ni Mrs. Flordeliza Domingo.
Segun ken ni Domingo, napan ni Miss Leni Gamiao iti classroom ni Miss Regina Agbayani tapno ipakaammo na a nagsobran ti oras ti panangklase na kadagiti grade 4 pupils.
Naamoan a ni Gamiao ti sumaruno a pag-klasyan dagiti ubbing.
Nupay kasta, maipagarop a kinagura ni Agbayani ti inaramid ni Gamiao gapu ta apaman a nagsubli ni Gamiao iti classroom na kadwa nan dagiti adalan na ket maipagarop a napan rinaot ni Agbayani ken nagado dagiti insawsawang na a saan a maiparbeng a sarita iti sangwanan a mismo dagiti ubbing.
Malaksid iti daytoy, maipagarop nga intudo-tudo pay ni Agbayani ni Gamiao.
Inbatad ni Domingo a saan pulos a simmungbat ni Gamiao ken kalpasan ti panagsasao kenkuana ni Agbayani ket pimmanawen daytoy a naglugan ti motorsiklo na.
Nagkedked metten ni Domingo a nangipaay ti komento ngem inpasingked na a mangiyuswat da ti komprontasyon iti nagbaetan dagiti dua a mangisursuro.
Rumrumuar a ni Agbayani ket masansan ti pannakiap-apa na kadagiti pada na a mangisursuro.
