LAOAG CITY – Nabirukanen ti maysa a mangngalap nga immunan a naireport a mapukpukaw kalpasan a nagabaliktad ti nagluganan na a bangka iti baybay iti paset ti Barangay 33-B, Lapaz ditoy ciudad ti Laoag.
Segun ken ni Mr. Meljay Antonio, bise presidente dagiti mangngalap iti nasao a barangay, iti oras ti alas-siete itay bigat ket simmalog da iti baybay kadwa na dagiti 10 pay a pada na a mangngalap a naglugan kadagiti innem a bangka.
Kuna na a kalpasan ti 30 a minutos a naglayag da ket nagpakada ni Joel Domingo kadagiti kakadwa na nga agsubli laengen gapu ta saan a kabaelan ti bangka na.
Nupay kasta, iti panagawid na ken dagiti tallo pay a kakadwa na ket nagbalaw da gapu ta awan pay ni Domingo.
Naamoan nga adda dagiti residente iti nadakamat a barangay a nakakita a naperdian ken nagbaliktad ti bangka a nagluganan ni Domingo iti katengngaan ti baybay ngem saan da a napan natulungan gapu ta nadawel ti baybay.
Nupay kasta, kalpasan ti sumagmamano nga oras ket nakita nga agtatapaw ni Domingo iti baybay a paset iti ili ti Pasuquin, ken iti agdama ket addan iti natalged a kasasaad.
Nakaawid metten dagiti dadduma a mangngalap nga isuda Michael Asuncion, Reynante Cortes, Jake Asuncion, Larry Antonio, Bryan Asuncion ken Alwyn Pascual.
Kabayatanna, inbatad ni Mr. Joel Domingo a saan a nalaka ti nagpasaran na makalasat laeng kalpasan a nagbaliktad ti nagluganan na a bangka iti baybay iti paset met laeng ti nasao a barangay.
Iti eksklusibo nga interview ti Bombo Radyo Laoag ken ni Domingo, inbatad na nga inaramid na amin a kabaelan na tapno makapaigid iti baybay.
Inlawlawag na a saanna a napuutan a nakadanun iti baybay a batog iti ili ti Pasuquin.
Kuna na nga apaman a nakapaigid ket insigida a nagkiddaw ti tulong ken dagus met nga adda dagiti tallo a residente iti nasao nga ili a timmulong kenkuana.
Innayon na a pinakpakan da daytoy ken inikkan da pay ti nagsukatan na a bado.
Ibilang na nga adal kenkuana ti napasamak ken saan ton a sumalog iti baybay no saan a napintas ti panawen.
