LAOAG CITY – Inbatad ni Brgy. Chairman Jesus Agbalog iti Brgy. Davila iti ili ti Pasuquin nga indanun kenkuana dagiti kalugaran na a mangngalap nga adda dagiti Vietnamese nationals a mapan mangkalkalap kadagiti payaw wenno rama da iti kabaybayan a paset ti nadakamat ng ili.
Gapu iti daytoy, kuna na nga insigida a napanna kinataripnong dagiti maseknan a mangngalap ken indanun da a dagus ti problema iti Philippine Coastguard.
Segun ken ni Agbalog, nangipatungpal a dagus ti Philippine Coastguard ti panagpatrolya iti kabaybayan a paset iti ili ti Pasuquin aglalo iti ayan dagiti rama dagiti mangngalap.
Innayon nga itultuloy ti Philippine Coastguard ti agpatrolya iti lugar no sadinno a nagkiddaw da pay ti dakdakkel a rubber boat nga usaren da.
Mainaig iti daytoy, kuna ni Agbalog a possible nga iti rabii ti papan panagkalap dagiti gangannaet kadagiti rama dagiti kalugaran na gapu ta awanen dagiti agbanbantay.
Innayon na a ti us-usaren dagiti gangannaet ket ti sigay a maminpinsan a mangtakal kadagiti lames isut gapuna a no mapan dagiti kalugaran da ket awanen ti makalap da.
Kabayatanna, kuna ti kapitan a kadagiti naglabas a tawen ket adda da payen dagiti dadduma a puli a napan nagkalkalap iti nasao a paset ti baybay gapu ta ado dagiti lames iti lugar.
