LAOAG CITY – Naalarma ni Mr. Ricardo Tolentino, presidente ti Mango Growers Association iti Ilocos Norte ken Region 1 gapo ta adon ti puun ti mangga iti Luzon ti nadadael gapo kadagiti insekto a cecid flies wenno kurikong ken dua pay a sabsabali.
Segun kenni Tolentino, adon ti naperdi a mangga idiay Ilocos Sur ken Central Luzon.
Inbatad na nga iti bulan ti Disyembre, Enero ken Pebrero ti kapigsa dagiti insekto nga umatakar kadagiti puun ti mangga.
Gapo iti daytoy, kuna na a naipasardeng ti panag-spray da kadagiti puun ti mangga gapo ta maperdi dagiti bunga na.
Inlawlawag na a dagiti insekto ket magustwan da ti nalamiis ken mapan da iti ruot ti aldaw gapo ta ti laeng rabii ti panagatakar da kadagiti mangga.
Mainaig iti daytoy, bassit laeng ti suplay ti mangga ita a panawen gapo iti nasao nga insekto.
Kabayatanna, kuna ni Tolentino nga awan met pay ti report a nadadael a mangga ditoy probinsya.
