LAOAG CITY – Kiniddaw ti grupo a Manilbela nga iti panagtugaw ti baro a sekretario ti Department of Transportation (DOTr) ket naan-anayen nga ikkaten daytoy ti jeepney modernization program.
Basar iti grupo a nasken nga iti panagtugaw ni Transportation Secretary Vince Dizon ket iyunana ti panangsuspenso ti pannakaipatungpal iti nasao a programa.
Napateg pay nga ituloy daytoy ti panangipaay ti prankisa kadagiti jeepney operators a saan a naka-consolidate.
Nakasagana ti grupo a maaddaan ti panagsasarita maipanggep kadagiti sumagmamano nga isyu.
Maipalagip a nagikkat iti puesto ni Transportation Secretary Jaime Bautista gapu ta kalikagumna a tutukan ti salun-atna ken suktan isuna ni Dizon mangrugi inton Pebrero 21.
