LAOAG CITY – Nakared alert ti Manila Disaster Risk Reduction and Management Office (DRRMO) ken ti Metro Manila Disaster Risk Reduction and Management Council (MMDRRMC) para iti pannakaisayangkat ti “peace rally” babaen kadagiti miembro ti Iglesia ni Cristo (INC) ita nga aldaw, Enero 13, 2025.
Kayatna a sawen ti red alert ket amin a personnel ti Manila Disaster Risk Reduction and Management Office ken ti Metro Manila Disaster Risk Reduction and Management Council ket nakaduty tapno adda dagiti agresponde a dagus no adda dagiti emergency.
Inrakurak ti Office of Civil Defense a gagem ti nasao nga addang ket tapno maipasigurado ti komprehensibo a safety measures para iti nasao nga aktibidad, no sadinno a manamnama a milyon a tattao ti makipartisipar iti Quirino Grandstand.
Kuna ni George Keyser, director ti Office of Civil Defense National Capital Region a ti kinatalged dagiti tattao ti kangrunaan a prayoridad da iti panagsagana da para iti nasao nga aktibidad.
Naamoan a nangideploy met ti Metropolitan Manila Development Authority iti 1,200 a personnel da para iti peace rally idinto nga inpakaammo met ni Manila Police District spokesperson Police Major Philipp Ines nga adda ti 3,000 a pulis nga inwaras da iti intero a Manila ita nga aldaw.
