LAOAG CITY –Nasuspenso ti face-to-face classes iti amin nga antas dagiti pampubliko ken pribado a pagadalan iti Manila inton bigat, Setiembre 21, gapu kadagiti manamnama a maiwayat a tignay protesta ken kadagiti dadduma pay nga aktibidad para iti maika-54 nga anibersario ti deklarasion ti Martial Law.
Inanunsio ni Manila Mayor Francisco “Isko Moreno” Domagoso ti suspension ita nga aldaw gapu iti rekomendasion ti Manila Police District (MPD).
Segun iti Mayor, kalikagum ti suspension a maprotehiran dagiti estudiante ken school personnel iti posible a nakaro a traffic, pannakaiserra dagiti kalsada ken ti panagtitipon dagiti nagduduma a grupo.
Gapu iti daytoy, binilin ti Mayor dagiti pampubliko ken pribado a pagadalan nga agaramat ti alternative learning modes tapno agtultuloy latta ti panagbasa dagiti estudiante.
Kabayatanna, basar iti Manila Police District, manamnama ti nagduduma a tignay protesta ken aktibidad iti Manila mainaig iti anibersario ti deklarasion ti Martial Law.
Immunan nga inanunsio ti militante a grupo a Bagong Alyansang Makabayan ti panangiwayatda ti programa iti Liwasang Bonifacio ken iti Mendiola.
Gapu iti daytoy, insaganan dagiti otoridad dagiti panagtignayda iti seguridad ken iti manamnama a nakaro traffic kadagiti lugar a manamnama a pakaisayangkatan dagiti panagtitipon.
