LAOAG CITY – Inpakaammo ni Brgy. Chairman Jessie Chris Lagundino iti Brgy. Pancian iti ili ti Pagudpud a mabalinen a madalyasatan iti paset ti Manila North Road iti Sitio Banquero, Brgy. Pancian iti nasao nga ili.
Nupay kasta, inlawlawagna nga adda ti naikeddeng nga iskedyul ti panagdalyasat dagiti motorista kas iti bigat ket iti oras ti ala sais ti bigat agingga alas otso ti bigat, iti malem ket iti oras ti alas dose ti tengnga’t pangaldaw agingga ala una ti malem idinto iti malem ket iti oras ti alas kuatro ti malem agingga alas singko y media ti malem.
Inbatadna nga mapattapatta nga umabot iti sangagasut a metro ti panagreggaay ti daga a mangitunda ti nakaro a pannakaitantan ti panagdalyasat dagiti motorista.
Kunana a basar iti pannakisarsaritana kadagiti empleado ti Department of Public Works and Highways a regular nga agbanbantay iti nadakamat a kalsada ket gagemda a mawaknitan a naimbag ti kalsada inton Miyerkules wenno Huebes ngem nakadepende daytoy iti situasion ti sasaaden ti panawen.
Kabayatanna, naminsan manen a nagpalagip ni Brgy. Chirman Lagundino kadagiti motorista a saan pay laeng nga agturturong iti Sitio Banquero, Brgy. Pancian iti ili ti Pagudpud no saan a napateg ti panggepda tapno maliklikan ti saan a napintas a mapasamak.
