LAOAG CITY – Kiniddaw ni Manila Representative Rolando Valeriano iti Commission on Audit (COA) ken iti Anti-Red Tape Authority (ARTA) a mangiwayat ti special audit iti Philippine Health Insurance Corporation wenno PhilHealth.
Kinunana a daytoy ket tapno maammuan no apay a saan nga episiente ti PhilHealth iti remittances kadagiti ospital agraman ti database management.
Inpettengna a dagiti audited financial statements ti PhilHealth idi 2023 ket umdasen a pakaibasaran ti naun-uneg nga audit tapno maammuan ti puon ken gapu ti agdama a problema.
Innayonna a mabalin a mangiwayat ti Commission on Audit ken Anti-Red Tape Authority ti agduma nga imbestigasion tapno adadda a matakuatan ti rason.
Iti nasao nga audit report, maipalagip nga awan ti umdas ken di umiso nga entries ti 1.3 million beneficiaries a mabalin a mangdoble ti enrollment iti PhilHealth Members Information System.
Naduktalan pay ti duplicate ken multiple entries para iti nasurok 266,000 a senior citizen members a katukad ti P1.33 billion a subsidiya.
Agraman ti nagan dagiti senior citizen a pimmusay ket saan pay a na-clear gapu ta karaman da pay laeng iti members database ken billings.
