LAOAG CITY – Naan-anayen nga inikkat ti korte ti sibubukel a termino ti panagserbi ni Alice Guo kas Mayor ti Bamban, Tarlac gapu ta maipagarup a daytoy ket maysa a Chinese ken saan a kualipikado para iti nasao a posision.
Daytoy ti nakailanad iti desision nga inparuk-at ni Presiding Judge Liwliwa Hidalgo-Bucu ti Manila Regional Trial Court (RTC) Branch 34 nga addaan ti petsa nga Hunio 27 ken nangaprobar iti quo warranto petition nga inpila ti Office of the Solicitor General.
Immunan a nangipila ti Office of the Solicitor General ti quo warranto petition ni Guo a naelektaran kas Mayor ti Bamban idi 2022 Elections tapno naan-anayen daytoy a mapadisi iti puesto.
Iti pannakairuar ti desision, inbatad ti Korte a ni Alice Guo ken ni Guo Hua Ping ket maysa a Chinese ken maymaysa dagitoy.
Iti panagdesision, inpetteng ti Korte a ti dua nga ebidensia ti gobierno nga awan ti birth, death ken marriage records para kadagiti nagannak ni Alice Guo ken ti panagbalin a saksi ti maysa a signature expert a nangibaga ti fingerprint ni Alice Guo ken ni Guo Hua Ping ket agka-match.
Kabayatanna, ni Guo ket addan ti sangapulo a bulan a nakabalud gapu iti non-bailable charge a qualified human trafficking.
