LAOAG CITY – Inbatad ni Engr. Shiela Opelac, ti City Agriculturist ditoy siudad ti Laoag a lumaklakayen dagiti mannalon no sadinno a manmano laengen dagiti aginteres nga agtalon.
Basar iti obserbasionda, naruay dagiti sumrek iti panagtalon no agretirodan iti trabaho dagitoy.
Kunana a suportaran ti lokal a gobierno kangrunaanna ti City Agriculture Office dagiti training iti 4-H Club no sadinno gutgutigutenda dagiti agtutubo nga adda ti kuarta iti panagtalon ken panagkalap gapu ta daytoy ti mangbibiag iti ekonomia iti pagilian.
Inlawlawagna a kalikagumda pay nga ipakaammo ti lokal a gobierno ditoy siudad ti kinapateg ti agrikultura kadagiti agtutubo.
Gapu iti daytoy, naisayangkat ti 12 4-H Youth camp and leadership training no sadinno a ditoy a naipaganetget kadagiti agtutubo dagiti banag no kasano a maipateg ti panagtalon ken panagkalap kas kadagiti nagduduma a livelihood projects a mabalinda nga iyaplikar ken pagsapulan.
Kabayatanna, inpakaammo met ni Mr. Edmar Garcia Tagama, Presidente ti 4-H Club nga adda ti 27 a chapter nga aktibo iti agdama.
