LAOAG CITY – Naiprayoridad nga inpaayan ti tulong ti Provincial Agriculture Office dagiti mannalon a nakaro a naapektaran kadagiti naglabas a bagyo.
Segun kenni Engr. Teresa Bacnat, ti mangidaudalo ti Provincial Agriculture Office, 30 a ribo a mannalon ti apektado ken saan a kabaelan nga agigiddan a maipaayan ti tulong.
Inbatad na a dagiti tulong a naipaay ket dagiti para iti high value crops kas iti bukel ti mais, pesticide ken fertilizers ken dagiti food packs kadagiti maseknan.
Mainaig iti daytoy, kunana a ti pondo ket manipud iti lima a porsiento a Disaster Fund ken dagiti dadduma a naibunong ket manipud iti stock da ken adda ti 15 a milyon a pisos a maigatang kadagiti inputs a naggapo met iti Quick Respond fund.
