LAOAG CITY – Sumango iti kaso a parricide ken illegal posession of firearms ti maysa a mannalon kalpasan a pinaltugan na ti bukod na nga asawa iti Sitio Cabatiw, Barangay 23 iti ili ti Sarrat.
Segun ken ni Police Major Carlo Abing, ti chief of police iti ili ti Sarrat, ti biktima ket agtawen ti 49 idinto a ti suspek nga asawa na ket agtawen ti 46, mannalon ken residente dagitoy iti nadakamat a barangay.
Inbaga na nga iti imbestigasyon, binaon ti lalaki ti asawa na a mapan agsingir ti pautang na ngem saan a nakasingir ti babai a nangitunda ti panagriri da.
Kuna ni Abing, iti panagriri dagiti agasawa iti uneg ti kwarto da ket naamoan a nabartek ti suspek ken napanna innala ti homemade shotgun na kalpasan na ket pinaputukan na ti naminsan ti biktima a nakatamaan ti perennial area ti babai.
Inbaga na a kabayatan ti panagriri dagiti agasawa ket nakangngeg dagiti karruba dagiti agasawa ti putok ti paltog.
Naitaray ti biktima iti Governor Roque Ablan Senior Memorial Hospital (GRASMH) ditoy ciudad ti Laoag ngem pimmusay kabayatan a maag-agasan.
Inbaga na a narekobre iti nakapasamakan ti krimen ti homemade shotgun nga addaan ti empty/fire cartridge ti 12 gauge shotgun.
Iti agdama, nagtalinaed iti kustodyar ti PNP iti ili ti Sarrat ti suspek.
Kabayatanna, inbaga ni Abing a basar iti palawag kadakuada ti suspek ket nagin-innangaw da laeng iti asawa na idi aksidente a nakalbit na ti gatilyo ti paltog na.
Innayon na nga inbaga ti suspek a ti paltog na ket nabayag nan a ginatang manipod iti pagayam na a agan-anop.
