LAOAG CITY – Natay ti maysa a mannalon kalpasan a nagbekkel iti ili ti Banna.
Segun kenni Police Staff Sgt. Jessie Balacad, imbestigador ti nasao nga insidente, agarup alas-singko ti malem idi kalman a nagresponde da ket nakita da ti lalaki a mannalon a nakabitin iti maysa a poon ti kayo.
Kuna na a possible a depresyon ti gapu na a nagpakamatay ti maseknan gapu ti panagproblema na iti igatang ti abono ken pagpakan na kadagiti taraken na a baka.
Inbatad ni Balacad a nadesgrasya pay ti biktima iti kallabes a nangitunda a naapektaran ti ulo na.
Immuna iti daytoy, napan kinita ti biktima dagiti taraken na baka tapno agpakan idi Agosto 22, ket dita a kellaat a nagpukaw agingga a nabirokan laengen a nakabitin iti poon ti kayo idi malem kalman.
