LAOAG CITY – Natiliw ti maysa a mannalon kalpasan a naduktalan nga adda ti ikot na a paltog bayat ti checkpoint iti Barangay San Mateo ditoy ciudad ti Laoag.
Nabigbig daytoy a ni Rumelito Molina y Batangan agtawen ti 53, naasawaan, maysa a mannalon ken residente iti Barangay 11, Lagandit iti ili ti Piddig.
Segun iti Philippine National Police ditoy ciudad ti Laoag, bayat ti panagcheckpoint dagiti otoridad ket pinara ni Patrolman Andrew Say Maliri ti behikulo ni Molina ken kiniddaw na nga ipakita na ti drivers license ken OR/CR ti lugan na ngem awan ti naipakita daytoy.
Kageddan iti daytoy ket nangiyuswat ti plain view inspection ti pulis iti lugan ti suspek ken ditoy a nakita na ti paltog iti likod a tugaw wenno iti back seat rason a dinamag na kenni Molina no adda ti dokumento daytoy ngem awan manen ti naipakita na.
Naamoan a dagiti nakumpiskar kenni Molina ket ti home made shotgun a loaded ti maysa a bala ti 12-gauge shot gun ken tallopay nga extra a bala iti nasao met laeng a paltog a naipan iti pouch.
Iti agdama, ti suspek ket nagtalinaed iti kustudiyar dagiti otoridad ken manamnama a mapilaan ti kaso a panaglabsing iti Republic Act 10591 wenno Comprehensive Firearms and Ammunition Regulation Act.
