LAOAG CITY – Natiliw ti maysa a mannalon gapu iti iligal a panagkalap na iti karayan iti Brgy. Santiago iti ili ti Solsona.
Binigbig ni Police Captain Chris Anthony Sorsano, hepe ti PNP Solsona ti maseknan ni Esron Sibaya, agtawen ti 33 ken residente iti nasao a lugar.
Kuna ni Sorsano a nakaawat da ti report nga adda ti agkurkuryente iti ikan iti karayan a sakopen ti Sitio Baltao West iti nasao a barangay.
Naaktuan dagiti nagresponde a pulis iti panagkuryente ti mannalon usar iti inaramid na a pagkuryente.
Nakumpiskar dagiti otoridad ti nasao a ramit agraman dagiti waya ken dadduma pay.
Inbatad ni Sorsano a direkta a naisaksak ti waya manipud iti pagtaengan ti mannalon nga agatiddog iti 190 a metro.
Ti palawag ni Sibaya a napan nagkuryente iti ikan gapu ta agpabunyag da.
Innayon ni Sorsano nga isagsagana da ti maipila a reklamo a panaglabsing iti RA 10654 wenno illegal fishing.
Naamuan a masansan nga ar-aramiden ti suspek iti agkalap usar iti kuryente.
