LAOAG CITY – Nabagkong ti maysa a mannalon babaen ti ulitegna iti Sitio Paswi, Brgy. Cayubog iti ili ti Paoay.
Segun ken ni Police Chief Master Sergeant Teddy Frank Ucol, ti Imbestigador iti Philippine National Police iti nasao nga ili, nabigbig ti biktima a ni Jonathan Ventura, agtawen ti 36, naasawaan ken residente ti nasao a barangay idinto nabigbig met dagiti suspek a ni Romeo Ventura, uliteg ti biktima nga agtawen ti 68, naasawaan, mannalon ken residente ti nadakamat a barangay pakairamanan ti barona a ni Ron Chester Ventura, agtawen ti 30, mannalon ken residente ti Brgy. 26, Oaig-Upay-Abulao iti ili ti Paoay.
Inbatadna a basar iti insayangkatda nga imbestigasion, bayat nga agin-inom ni Romeo kaduana ti kabsatna a ni Ernesto Ventura ken ni Jaime Daradar iti family house ti pamilia Ventura ket maipagarup a rimuar iti kuarto ti biktima ket ditoy a kinomprontarna ti ulitegna kagiddan ti panangibagana a “Nalpas la ngaruden uncle dagita, ania pay laeng ti kayatmo?.”
Inlawlawagna a kalpasan iti daytoy ket simmangpet met ni Ron Chester no sadino insawangna ti balikas a “Kayatmo ta papispisanka” idinto a simmungbat ti biktima a “Saanka agkasta-kasta cousin ta ipalpalawagkon.”
Kunana a gapu iti daytoy a nabara a panagsinnungbatda ket dita a kellaat a napan dinanog ni Ron Chester ti biktima idinto a ti amana ket nagtaray a nangala ti kutsilyo wenno kitchen knife tapno tulungan ti barona.
Nupay kasta, inpalgak ni Police Chief Master Sergeant Ucol a dinanog met ti biktima ti ulitegna iti ulona ti bote gapu iti panangbagkongna kenkuana iti barukong daytoy ken ditoy a nagpaarayat ti biktima kadagiti kaarrubana.
Mainaig iti daytoy, dagus a naitaray ti biktima iti Mariano Marcos Memorial Hospital and Medical Center iti siudad ti Batac babaen ti live-in partner daytoy a ni Lyka Misolas.
Kabayatanna, nagtalinaed met iti nasao nga ospital dagiti agama kalpasan a nagsagaba met ti sugat dagitoy.
Immuna iti daytoy, naammoan nga addan ti dati a susik dagiti aguliteg iti kallabes.
