(Update) LAOAG CITY – Addan iti natalged a kasasaad ni Rex Claveria, maysa a mannalon ken residente iti Barangay 8, San Antonio iti ili ti Sarrat.
Daytoy ket kalpasan a naitaray idi rabii iti hospital kalpasan a pinalpaltugan da bayat a magmagna a mapan gumatang iti pulutan.
Kinumpirmaran daytoy ni P/C/Insp. Joseph Baltazar, Hepe ti Pulsiya ti nasao nga ili.
Kuna na a dagiti tama ni Claveria ket ti ngatuen ti buksit, luppo ken bakrang.
Naipadalan metten ti pharaffine examination dagiti agama a Barangay Kagawad, da Bgy. Kagawad Edison Bolibol ken Bgy. Kagawad Policarpio Bolibol ken uppat a sabsabali pay.
Maipadalan pay ti cross matching examination dagiti tallo a kapsula ti mapapati a kalibre 45 a paltog a narekubre iti nakapasamakan ti pammaltog.
Innayon ni Baltazar nga agpapan ita ket saan pay a nalawag no ania ti motibo ti nasao a pammaltog.
Inlawlawag pay ni Baltazar nga agtalinaed pay laeng iti kustodyar da ni Edison bayat ti agtultuloy nga imbestigasyon da.
