LAOAG CITY – Nadiskubre a maysan a nalamiis a bangkay ti maysa a lalaki iti Sitio Cabaroan, Barangay Lydia iti ili ti Marcos.
Binigbig ni Police Senior Master Sergeant Leonardo B. Battulayan, Acting Chief Investigator iti PNP iti ili ti Marcos, ti biktima a ni Archival Umaoid y Lubong, agtawen ti 35, awanan ti asawa, mannalon ken residente met laeng iti nasao a barangay.
Immuna iti daytoy, inpakaammo ni Battulayan nga idi rabii ti miyerkules ket namintallo da a napan nagresponde iti lugar kalpasan a naireport kadakuada ti panaggiinnubor dagiti agkakarruba a pakairamanan ni Umaoid.
Nupay kasta, kuna na nga awan ti nagammatan da gapu ta no mapan da agresponde ket agtataray dagiti maseknan.
Inlawlawag na nga iti kabigatan na ket nakita laengen ni Melvin Robuelto a saanen nga agang-anges ti pagayam na a ni Umaoid.
Iti palawag ni Robuelto iti PNP, immuna a nakita na ni Umaoid a nakaidda iti ruwar ti balay da isut gapuna a binagkat na daytoy a napan inpaidda iti tugaw iti kusina da.
Inpasigurado ni Robuelto kadagiti kameng ti pulisya a sibibiag pay laeng iti dayta a gundaway ni Umaoid gapu ta dinamag na pay kenkuana no kayat na ti maipan iti ospital gapu ta agbakbakwar daytoy, ngem nagkedked ti biktima ken inbaga na nga agidda ken iturog na lattan.
Iti kabigatan na ket nadiskubre laengen ni Robuelto a saanen nga agang-anges ti pagayam na rason a nagpatulong iti pamilya na.
Inbatad ni Battulayan a nagturong da a dagus iti lugar kalpasan a naitawag kadakuada ti napasamak ken iti panangeksamen ti Municipal Health Officer a ni Doctor Cesar Carullo iti bangkay ket inpasingked na nga awan ti foul play iti pannakatay ti biktima gapu ta awan ti nakita na nga aniaman a sugat iti bagina.
Innayon ni Battulayan a saan a kontento ti pamilya ni Umaoid iti naibaga ti Doctor Carullo nga awan ti foul play iti pannakatay ti biktima gapu ta kiniddaw da a maipadalan ti otopsiya ti bangkay tapno maamoan ti pudno a nakatayan na.
Naamoan met da Battulayan a ti biktima ket agpaspasar ti hypertension.
