LAOAG CITY – Awanen ti biag ti maysa a mannalon a nakita iti uneg ti pagtaengan na iti Brgy. Cabusligan iti ili ti Bacarra kalpasan a nagbekkel.
Segun ken ni PMaj. Arnel Tabaog, hepe ti Philippine National Police – Bacarra, ti biktima ket agtawen ti 42, naasawaan, mannalon ken residente iti nadakamat a barangay.
Kuna na a basar iti naiyuswat nga imbestigasyon, idi pay laeng aldaw ti domingo a saanen a nakita a rimuar iti pagtaengan na.
Inbatad na nga idi bigat kalman ket nakaangot dagiti karruba na ti nabangsit ken aggapo iti pagtaenganna.
Gapu iti daytoy, ginandat dagiti karruba na a sumrek iti pagtaengan na ngem saan a malukatan ti ridaw rason a nagkamang dagitoy iti barangay officials agingga a naipadanon iti kapulisan.
Inpakaammo na a dita a nagresponde ti kapulisan ken napilit a nalukatan ti ridaw ti balay ti biktima agingga a nakita daytoy a nakabiten iti uneg ti banyo usar ti tali.
Naamoan a mangrugin nga agrupsa ti bangkay ti biktima idi nabirokan.
Kabayatanna, adda ti annak ti biktima ngem agnanaed dagitoy iti ili ti Piddig idinto a ti asawa na ket agtrabtrabaho iti ballasiw taaw.
Kuna ni hepe Tabaog a posible a problema iti pamilya ken imon ti kangrunaan a rason iti panangkettel ti biktima iti bukod na a biag.
Innayun na nga awan met ti makita a foul play iti pannakatay ti biktima.
