LAOAG CITY – Kinumpirmaran ni PMaj. Joseph Tayaban, ti hepe ti PNP-Badoc a maysa a lalaki ti natay iti Brgy. Saud iti ili ti Badoc kalpasan a nakimat.
Binigbig ni Tayaban ti biktima a ni Dexter Gampong y Valencia, agtawen ti 39, naasawan, mannalon ken residente iti nasao a barangay.
Kuna ni Tayaban a basar iti palawag ti asawa ti biktima, mapan agilunong ti taraken a kalding ni Gampong gapu iti napigsa a panagtudtudo ken panagkimat.
Nu pay kasta, bayat ti panagturong ti maysa met laeng a mannalon iti nakaiwarwaran dagiti kalding tapno mapan met agiyapon ti taraken ket naduktalanna a nakadasay ni Gampong ken awanen ti biagna.
Inbatad ni Tayaban a basar iti inspeksyon ni Dr. Edgar Cabading, ti municipal heath officer iti Badoc iti biktima, natay daytoy gapu iti electrocution struck by lighting.
