LAOAG CITY – Pimmusay ti maysa a mannalon iti napasamak a desgrasia iti sakupen ti Brgy. Ablan iti ili ti Burgos.
Binigbig ni PCapt. Sheryl Guzman, Chief of Police ti PNP Burgos ti biktima a ni Arthur Lagpacan, agtawen ti 46, awanan asawa ken residente iti Brgy. Bubon iti nadakamat nga ili.
Segun ken ni Guzman, naidungpar ti biktima ti motorsiklo na a Yamaha Sniper X1 nga addaan ti Plate Number 5928-AB nga agmaris ti nalabbaga iti maysa a sementado a poste iti kalsada.
Gapu iti daytoy, kuna ni Guzman a nagsagaba ti biktima ti nakana a sugat iti ulo gapu iti pannakaitupa na ken nangitunda ti dagus a pannakatayna.
Inlawlawagna a kabayatan nga agturong ti biktima iti agpaabagatan a direksion ken agawid manipod iti naginuman na ket naawanan ti kontrol ti manibela gapu iti kaadda ti impluwensiya ti nasanger ken napaspas ti tarayna bayat iti panangiturongna iti motorsiklo.
Innayun ti hepe a saan a nakasuot ti helmet ti biktima idi napasamak ti desgrasia.
