LAOAG CITY – Pimmusay ti maysa a mannalon kalpasan ti napasamak a desgrasya iti Dingras-Marcos Road, bisinidad ti Brgy. Guerrero iti ili ti Dingras.
Nabigbig ti biktima nga agtawen ti 54, mannalon ken residente iti Brgy. Barong iti nasao nga ili.
Basar iti imbestigasyon ti PNP-Dingras, nagparking ti biktima ken lumasat kuma iti kalsada.
Nu pay kasta, apaman a lumasat ket kellaat a nadungpar ti motorsiklo a Rider 150 nga inturong ti agtawen ti 33 a taga Brgy. Catagtagen iti ili ti Banna ken agpaabagatan a direksyon.
Gapu iti daytoy, nagsagaba ti tukkol iti saka ken duri ti mannalon idnto a nasugsugatan iti nagduduma a paset ti bagi ti nakadungpar iti daytoy.
Naitaray dagitoy iti Dingras District Hospital ngem naiyakar iti pribado nga ospital ditoy siudad ti mannalon.
Kabayatanna, bayat a matamtaming ti mannalon ket dita a pimmusay.
Agtultuloy ti imbestigasyon dagiti otoridad iti nasao nga insidente ken manamnama nga agsarita dagiti agsinumbangir a partido.
