LAOAG CITY – Pimmusay ti maysa a mannalon kalpasan a nalmes iti Callaguip River, bisinidad ti Brgy. Callaguip iti ili ti Paoay.
Binigbig ni PMaj. Eddie Suyat ti biktima a ni Edgar Galzote Jr. Agtawen ti 38, naasawaan, mannalon ken residente iti nadakamat a barangay.
Kuna ni Suyat a basar iti palawag dagiti nakainnoman ni Galzote, napan nagdigos ti biktima iti karayan idi nalpas a naggi-inom dagitoy.
Nu pay kasta, saan dan a nakita a nagsubli wenno nakalung-aw ti biktima manipod iti danom.
Nabirokan laengen ti bangkay ti biktima babaen ken ni Albert Piedad iti Brgy. Paratong iti nasao nga ili.
Naideklara a dead on arrival ti biktima babaen ken ni Dr. Cherry Pamo iti Municipal Health Office iti ili ti Paoay.
