LAOAG CITY – Naarestar ti maysa a lalaki babaen ti inyuswat a search warrant operation dagiti kameng ti PNP-CIDG ken ti INPPO iti Purok Purok 3 Brgy. Camandingan iti siudad ti Batac.
Nabigbig ti suspek a ni Sonny Sagun y Esteban, agtawen ti 58, naasawaan, mannalon ken residente iti nasao a barangay.
Kuna ni PMaj. Nelson Apostol, ti mangidadaulo ti PNP-CIDG a ti search warrant a naipresentar iti operasyon ket inparuk-at ni Hon. Rusty M Naya, Executive Judge iti Regional Trial Court Branch 51 iti First Judicial Region idiay Tayug, Pangasinan ken napetsaan ti Pebrero 22, 2021.
Nakumpiskar manipod iti suspek ti maysa nga Armscor M1911 cal. 45 ken maysa a caliber 22 rifle pakairamanan ti 129 a bala ti cal. 45, upppaT a magazine ti caliber 45 pistol, sangapulo a bala ti caliber 22, maysa nga inside holster ken tallo a magazine pouch ti caliber 45.
Naamoan nga addaan ti lisensya ti caliber 45 a paltog ngem nag-expire daytoy idi Hunyo 24, 2015.
Kabayatanna, basar iti imbestigasyon ti PNP, maipagarup nga itugtugot pay ti suspek ti paltog na.
Iti agdama, nagtalinaed iti kustodyar dagiti otoridad ti suspek para iti naan-anay a pannakaipila kenkuana ti kaso a panagsalungasing ti RA 10591 wenno ti Comprehensive Law on Firearms and Ammunition.
