LAOAG CITY – Inbatad ni PLt. Col Roger Digmayo, ti chief of police iti siudad ti Batac nga street level individual ti natiliw iti naisayangkat a drug buybust operation iti Brgy. 2 iti nasao nga ili.
Segun kenni Digmayo, tawen 2019 pay laeng idi nangrugi a naminotor ti suspek a ni Arnold Rebucal, agtawen ti 56, awanan asawa, mannalon ken residente iti Brgy.16-S Quiling Sur iti siudad ti Batac.
Kuna na a saan laeng nga iti siudad ti paglaklakoan ni Rebucal iti illegal a droga nu di ket uray dagiti kabangibang a lugar.
Kabayatanna, nakumpiskar kenni Rebucal ti dua a sachet ti maipagarup a shabu pakairamanan ti maysa a sachet a ginatang ti pulis a nagpammaranag a poseur buyer, marked money a 500 a pisos ken ti nasurok 3,000 a personal a kwarta na.
Immunan a naglikudan ni Rebucal iti panaglako na iti maipagarup a shabu ken inpetteng na a mapan laeng gumatang ti kalding iti Brgy. Nalasin iti ili ti Paoay.
Maisagsaganan ti maipila a kaso a panagsalungasing ti RA 9165 wenno Comprehensive Dangerous Drugs Act of 2002 kontra iti suspek.
