LAOAG CITY – Balligi a naarestar ti maysa a mannalon babaen iti naisayangkat a search operation iti Brgy. 7, Caruan iti ili ti Pasuquin.
Segun ken ni Police Major Julius Basalio, ti Hepe iti Philippine National Police iti nasao nga ili, nabigbig ti subject ti operasion nga agtawen ti 40 ken residente iti nasao met laeng a barangay.
Inbatadna nga adda ti naawatda nga impormasion a maipagarup nga agik-ikot daytoy ti iligal a paltog ken maipagarup pay nga us-usarenna nga armas dagitoy rason a nangiwayatda ti search operation kontra iti suspek babaen iti inyisyu ni Hon. Charles Javier Calapini, ti Presiding Judge ti Regional Trial Court 1st Judicial Region Branch 19 iti ili ti Bangui a napetsaan idi Mayo 2 ita a tawen.
Gapu iti daytoy, kunana a naala manipod iti suspek ti maysa a long improvised homemade shotgun, maysa a short improvised homemade shotgun ken tallo a bala ti 12 gauge shotgun.
Inlawlawagna a balligi a naiwayat ti operasion babaen iti nagtitipon a puersa ti Pasuquin Municipal Police Station kas lead unit, PIU, RID-PRO1 TMRU cluster 2, 1st PMFC, ken MARPSTA MLET.
Innayonna a ti nasao nga operasion ket naimatangan dagiti maseknan a barangay officials ken nagbalin a naannayas ti pannakaipatungpal ti search operation.
