LAOAG CITY – Balligi a naarestar ti maysa a mannalon babaen ti Anti-Illegal Drug Buy-bust Operation iti Barangay Bil-loca iti siudad ti Batac.
Nabigbig ti suspek a ni Amos Jose Agdigos, agtawen ti 61, naasawaan ken residente ti Barangay Cal-laguip iti nasao met laeng a siudad.
Basar iti Batac City Police Station, natiliw ti suspek kalpasan a maipagarup a naglako ti maysa nga heat sealed transparent plastic sachet a naglaon ti maatap a shabu iti maysa a police poseur buyer.
Malaksid iti daytoy, nakumpiskar pay dagiti otoridad manipud iti suspek ti 12 a pedaso nga small transparent heat-sealed plastic sachet a naglaon ti mapapati a shabu, maysa a black pouch bag, maysa a brown paper bag, tallo a live ammunition ti caliber .45; innem a boodle money; maysa a black pocket knife ken maysa nga one thousand peso bill a nausar kas buy-bust money.
Kabayatanna, sumango ti suspek iti kaso gapu iti panaglabsingna iti Comprehensive Dangerous Drugs Act of 2002 ken Comprehensive Firearms and Ammunition Regulation Act.
