LAOAG CITY – Naarestar ti maysa a mannalon iti Anti-Illegal Drug Buy-bust Operation iti Barangay Utol iti ili ti Bangui.
Nabigbig ti suspek a ni George Agarpao, adda iti umno a tawen ken residente iti nasao a barangay.
Basar iti Bangui Municipal Police Station, natiliw ti suspek kalpasan a naglako ti maysa nga heat sealed transparent plastic sachet a naglaon ti maipagarup a shabu iti police poseur-buyer nga agbalor ti maysa a ribu a pisos.
Malaksid iti daytoy, nakumpiskar pay dagiti otoridad manipud iti suspek ti lima nga heat sealed transparent plastic sachet a naglaon ti maatap a shabu.
Maibilang ti suspek kas maysa nga Street Level Individual ken dati a drug surrenderee.
Naiget met a naglikudan ti suspek a kukuana dagiti naala nga ebidensia kontra kenkuana.
Naammoan nga addan dagiti immun-unan a pannakatiliw ti suspek gapu met laeng iti iligal a droga.
