LAOAG CITY – Inlawlawag ni Police Captain Sygman Benigno, ti Hepe iti Philippine National Police iti ili ti Paoay nga awan ti foul play iti pannakatay ti biktima a nalmes iti waig iti Brgy. 26 Oaig-Upay Abulao iti ili ti Paoay.
Segun kenkuana, nabigbig ti biktima a ni Artemio Bailon y Mangligot, agtawen ti 42, mannalon, awanan asawa ken residente iti nasao met laeng a barangay.
Inbatadna a basar iti insayangkatda nga imbestigasion, kuna ti nakakita a ni Ronel Guinayon y Fordaleza, agtawen ti 25, mannalon, awanan asawa ken residente iti nadakamat a lugar nga agarup alas siete ti rabii idi Marso 19 ket napan isuna iti waig tapno mapan agbanniit ket ditoy a nakitana ti biktima nga agtatapaw.
Gapu iti daytoy, kunana a dagusna nga inpakaammo daytoy kadagiti kabagian ti biktima pakairamanan kadagiti barangay officials, Rural Health Unit, Bureau of Fire Protection ken Philippine National Police no sadino dagus met dagitoy a nagresponde iti nakapasamakan a lugar.
Inlawlawagna a basar iti imbestigasion, sakbay ti insidente iti agarup alas otso ti bigat iti nasao met laeng a petsa, ti biktima ken ti pagayamna a ni Noli Cabuyadao y Manayan, agtawen ti 27, mannalon, awanan asawa ken residente iti nasao met laeng a barangay ket nagiinomda a dua iti pagtaengan da Noli ket idi nalpasda a naibus ti maysa a bote ti arak ket napanda iti waig tapno agbanniit.
Inpalgakna a nakaturog iti asideg iti waig ni Noli idinto a saanna a naripar ti kaduana kadayta a gundaway agingga a nagawid daytoy iti pangaldawen a saanna ammo a saan pay a nakaawid ti biktima.
Mainaig iti daytoy, kuna ni Police Captain Benigno a narekobre ti bangkay ti biktima iti waig no sadino nangiyuswat ti physical examination ni Dr. Cherry Mae Pamo, ti Municipal Health Officer iti ili ti Paoay.
Kabayatanna, naammoan a naikabil ti bangkay ti biktima iti puneraria iti Brgy. 20, Paratong iti ili ti Paoay.
