LAOAG CITY – Inbatad ni Barangay Chairman Nelson Ballesteros iti Barangay 14 iti ili ti Sarrat a dagiti mannalon a nakaawat ti ayuda manipod iti Department of Agriculture (DA) ket isuda dagiti nagrehistro iti RSBSA.
Inlawlawag ni Ballesteros nga immunan nga inbilin na kadagiti mannalon iti Barangay da nga agrehistro da iti RSBSA tapno makaawat da ti lima ribo a pisos nga ayuda manipod iti DA.
Nupay kasta, kuna na nga umabot laeng iti 127 a mannalon iti barangay da ti nagrehistro.
Innayon na a dagiti kwalipikado para iti nasao a programa ket dagiti nababbaba ngem dua nga ektarya ti taltalunen na ken dagiti naapektaran ti talon na kadagiti naglabas a bagyo ditoy probinsya.
Mainaig iti daytoy, inpakaammo ti mayor a mabalin paylaeng a mapan agrehistro dagiti dadduma a mannalon iti RSBSA tapno makaawat da ti lima ribo a pisos nga ayuda.
