LAOAG CITY – Nasugatan ti saka maysa a mannalon kalpasan a pinaltugan ti maysa kadagiti pulis a nagresponde iti Barangay Nagpatpatan iti ili ti Solsona.
Nabigbig daytoy a ni Dennis Rumbaoa, agtawen ti 38, naasawaan ken residente iti nasao a barangay.
Immuna iti daytoy, nagresponde dagiti kameng ti pulisya a pakairamanan da Police Corporal Melchor Edillo ken ni Police Staff Sergeant Alex Hadji Mateo iti balay da Rumbaoa kalpasan a naireport kadakuada nga ar-armaran na ti suspek ti kutsilyo ti asawa na.
Iti panagresponde dagiti otoridad ket nagtaray ni Rumbaoa iti taltalon ken idi mapan tiliwen dagiti dua a pulis ket ginandat na a bagkungen dagitoy.
Gapu iti daytoy, pinaltugan ni Mateo ti akin-kannigid a luppo ni Rumbaoa babaen ti service firearm na a maysa nga M16 Armalite Rifle.
Kabayatanna, inadmitir ni Mr. Eugene Martinez, uliteg ti suspek a masansan a kabilen, kaapa ni Rumbaoa ti asawa na, ken adda pay ti gundaway a pinuuran na ti bado ti babai ken ginandat na a bagkungen daytoy.
Innayon ni Martinez nga adda kurkurang ti panunut ti kaanakan na ken puli da daytoy gapu ta adda met ti kurkurang ti ina ni Rumbaoa.
Kabayatanna, inbatad ni Police Capt. Chris Anthony Sorsano, ti chief of police iti ili ti Solsona, namin-adon a daras a rinespondian da ni Rumbaoa gapu iti panangap-apa ken panangdangdangran na iti asawa na.
Inbatad na a pilaan da ti reklamo nga attempted homicide ken direct assault ti nasao a suspek.
