LAOAG CITY – Problema iti panagpadanum ti namunganayan ti panangtagbat ti suspek ti laklakay a kabsat na iti Brgy. Bagut iti ili ti Dingras.
Daytoy ti inpakaammo ni Police Senior Master Sergeant Jayson Calma, imbestigador ti PNP Dingras.
Binigbig ni Calma na ti biktima a ni Alejandro Valencia y Juan, agtawen ti 65, mannalon, ken ti suspek ket ni Ildefonso Valencia, agtawen ti 62, mannalon.
Segun kenni Calma, pinadanuman ti suspek dagiti mula a mais ti biktima iti pagtatalonan idi ta nakita met ti biktima daytoy ken napan na kinomprontar gapu naglaplapyas ti padanum na.
Gapu iti daytoy, naaddaan ti nabara a diskusyon dagiti agkabsat agingga a nangasot ti suspek iti buneng.
Kuna ni Calma nga insigida a tinengel ti biktima ti ima ti suspek tapno malapdan nga itagbat na kenkuana ti imet na a buneng.
Kabayatan a tengtengelen ti biktima iti ima ti suspek, nagpakaasi daytoy nga ibbatan ti biktima iti ima na.
Kalpasan na, kelaat nga intagbat ti suspek ti iggem na a buneng iti kabsat na rason a nagsagaba ti sugat iti akin kannawan a pingping ken iti timid na.
Nupay kasta, nakarwaren ti biktima iti ospital kalpasan a nataming dagiti sugat na.
Inbunannag ni Calma nga adda pay ti dati a susik dagiti agkabsat panggep iti sanikua.
Innayon na a maisagsaganan dagiti dukomento a maipila kontra iti suspek ken nagtalinaed iti kustudyar ti PNP Dingras.
