LAOAG CITY – Nasugatan ti ulo ti maysa a mannalon kalpasan a napaltugan iti Sitio Abkir, Barangay Suyo iti ili ti Dingras.
Nabigbig ti biktima a ni Mr. Arthur Fernando, agtawen ti 37, addaan ti live-in partner, mannalon ken residente iti nadakamat a barangay.
Basar iti impormasyon a nakalap ti news team ti Bombo Radyo Laoag, adda ti sumagmamano nga indibidual a napan nangbisita ken ni Fernando iti balay da kalpasan na ket napan da pinasyar dagiti mula na a kamatis.
Naamoan nga iti panagsubli da Fernando iti balay da ket nakisarita pay laeng kenkuana dagiti bisita na ngem kalpasan laeng ti sumagmamano a minutos ket pinaltugan dan daytoy a nakasugatan ti likud ti ulo ti biktima.
Naitaray a dagus ti biktima iti Governor Roque Ablan Senior Memorial Hospital (GRASMH) ditoy ciudad ti Laoag ngem naiyakar iti Mariano Marcos Memorial Hospital and Medical Center (MMMH&MC) iti ciudad ti Batac.
Awan dagiti ebidensya a narekobre dagiti otoridad iti nakapasamakan ti pammaltog.
Mainaig iti daytoy, inbatad iti Bombo Radyo Laoag ni Barangay Chairman Amando Taylan iti Barangay Suyo iti ili ti Dingras ket awan ti madi a rekord ti biktima iti barangay da ngem adda dagiti madamdamag na a no makainom ti nasanger ket agsao-sao, ngem awan pay ti nagreklamo iti barangay kontra kenkuana.
Kabayatanna, inpakaammo iti Bombo Radyo Laoag ni Police Major Jephre Taccad, ti pannakangiwat ti llocos Norte Police Provincial Office (INPPO) nga addan ti person of interest ti PNP-Dingras iti pannakapaltog ni Fernando.
Kuna na a basar kenni Police Major Joseph Calderon, ti chief of police iti ili ti Dingras, possible nga agam-ammo met laeng ti biktima ken ti suspek.
Innayon na a ti nausar iti krimen ket maipagarop a Caliber 22 a paltog ngem nagasat ti biktima gapu ta saan a napurwan ken iti agdama ket addan iti natalged a kasasaad.
Inpalgak ni Taccad a saanda pay a maibaga no gun for hire ti suspek gapu ta ti ar-aramaten dagiti maseknan ket napipigsa ti kalibre na a paltog idinto a ti nausar iti pannakapaltog ni Fernando ket maipagarop a caliber 22.
Inbatad pay ni Taccad nga addan dagiti testigo a naimbitaran iti kwerpo ti pulisya tapno maalaan da ti naan-anay a palawag mainaig iti pannakapaltog ni Fernando.
