LAOAG CITY – Natay ti maysa a lalaki a nakamotorsiklo kalpasan a nakadinnungpar na ti maysa a truck iti paset ti Barangay Pancial iti ili ti Pagudpud.
Inbatad ni Police Major Edwardo Santos, ti chief of police iti ili ti Pagudpud a ti biktima ket maysa a mannalon ken residente met laeng iti nasao a barangay.
Inbaga ni Santos a basar iti imbestigasyon da, agpapa-amyanan ti biktima ken idi nadanun na ti agkurba a paset ti kalsada ket na-overshoot a nangitunda ti pannaka-slide na iti agarop siyam a metro.
Innayon na a gapu iti daytoy ket timmama ti nakamotorsiklo iti nakasabat na a truck a nagsagabaan na ti nakana a sugat kangrunaan na iti ulo na.
Inpakaammo ni Santos a saan pay a nakapagsasarita ti driver ti truck ken ti pamilya ti biktima gapu ta ti asawa ti pimmusay ket adda iti abroad.
Naamoan a ginandat ti driver ti truck a liklikan ti biktima babaen ti panagpaigid na ngem timmama latta ditoy ti motorsiklo.
Gapu iti daytoy, ibilang ni Santos a desgrasya ti napasamak.
Nagtalinaed met ti driver ti truck a taga Bacarra iti kustodyar ti PNP iti ili ti Pagudpud.
