LAOAG CITY – Natay ti maysa a mannalon kalpasan a nakimat iti Sitio Corcuera iti Brgy. Laureta iti ili ti Solsona.
Segun ken ni P/Capt. Norman Pentang, Hepe ti Solsona Municipal Police Station, nabigbig ti biktima a ni Oswaldo Baltazar y Mandigma, agtawen iti 60, naasawaan ken residente ti Brgy. Laureta iti nasao nga ili.
Inbatadna a nagturong ti biktima iti kataltalonan tapno iyapon koma ti tarakenna a baka ngem apaman nga agsubli daytoy iti kubo-kubo ket kellaat a natamaan daytoy ti kimat.
Gapu iti daytoy, kuna ni P/Capt. Pentang a dagus a naitaray iti Rural Health Unit iti ili ti Solsona ti biktima ngem naideklara a dead on arrival babaen iti attending physician a ni Municipal Health Officer Dr. Ruth De Lara.
Kabayatanna, naammoan nga agar-arbis idi napasamak ti insidente.
