LAOAG CITY – Natay ti maysa a lalaki kalpasan a nagbekkel idiay Barangay 4, Bacarra, Ilocos Norte.
Nabigbig ti biktima a ni Vien Malorca y Bino, agtawen ti 38, naasawaan, maysa a mannalon ken residente iti nasao a lugar.
Segun ti imbestigasyon dagiti otoridad, immuli ti biktima iti acacia tree nga adda iti asideg ti pagtaengan da.
Mapatta-patta nga umabot ti 20 feet ti kangato ti inuli ti nasao a biktima.
Basar ti palawag ti asawa na a ni Hilda Malorca y Acosta, agtawen ti 38, nakita na ti biktima nga adda iti ngato ti kayo ken pabpababaen na daytoy ngem bayat a kasarsarita na ket kellaat lattan a timmapwak.
Saan a ninamnama ni Hilda a nakagalot ti tengnged ti biktima usar ti waya apaman a timmapwak.
Gapo iti daytoy, dagus a nagpaarayat ti babai kadagiti karruba da ken naitaray iti ospiatl ngem naideklara a dead on arrival.
Iti biang ti PNP ket awan ti nakita da a foul play iti nasao a pasamak.
Agpapan ita ket saan pay nga ammo dagiti otoridad no anya ti pudno a rason ti panagpakamatay ti nasao a biktima.
