LAOAG CITY – Balligi ti naiyuswat a drug buy bust operation babaen kadagiti kameng ti PNP Paoay, PNP Batac, PDEU, PDEA, INPPO, Provincial Intelligence Unit iti pannakatiliw ti maysa a lalaki iti Brgy. Dolores iti ili a Paoay.
Nabigbig daytoy a ni Alladin Baylon, 43, tubo iti Brgy. Mabaleng iti ciudad ti Batac ken residente iti nasao Brgy. Dolores, Paoay.
Segun kenni P/Capt. Eddie Suyat, COP iti PNP Paoay, natiliw ni Baylon kalpasan a nagatang ti police poseur buyer ti dua a sachet a naglaon ti maipagarup a shabu.
Narekobre pay manipod iti suspek ti maysa a sachet ti maipagarup a shabu a naipalaon iti posporo.
Sakop ti lugar a lalakoan ti suspek ti ilegal a droga ket iti Paoay ken Batac.
Maibilang ni Baylon iti Provincial Level Drug Watchlist.
Kabayatanna, naglikudan ni Baylon nga aglaklako ken agususar daytoy ti ilegal a droga.
