LAOAG CITY – Isaruno ti Provincial Government of Ilocos Norte babaen iti Provincial Agriculture Office ken ti Sustainable Development Center ti pannakaipaay ti tulong kadagiti mannalon nga agmulmula ti tabako ken High Value Crops.
Inlawlawag ni Engr. Maria Teresa Bacnat, Officer In-Charge ti Provincial Agriculture Office a daytoy ket gapu ta ita a bulan ti Nobiembre ti panawen a panagmumula kadagiti nasao a produkto.
Inbatadna a karaman kadagiti maipaay kadagiti maseknan a mannalon ti abono, pestisidio, insektisidio pakairamanan dagiti babassit a makinaria ken kagamitan a pagtalon.
Segun pay kenkuana, maisarunonto iti pannakaisayangkat manen ti Capitol Express tapno maipadanon a mismo dagiti kakailian nangnangruna kadagiti mannalon no ania ti kalikagumda a maipaay a tulong kadakuada ken mabalin pay a maited a dagus ti kiddaw dagitoy no adda ti maitugot ti probinsia.
Kabayatanna, kunana a dagiti tulong para kadagiti agmulmula ti bawang, lasona ken sibuyas ket immunan nga inpaay ti probinsia idi bulan ti Oktubre gapu ta addan dagiti sumagmamano a nangrugin a nagmula.
Kagiddan daytoy, pinalagipan ni Bacnat dagiti mannalon a masapul nga obserbarenda nga umuna ti sasaaden ti panawen.
Innayonna a no adda ti forecast ti PAG-ASA a kaadda ti mapasaran ti probinsia a bagyo ket saan pay laeng nga agmula dagiti mannalon nangnangruna iti bawang, lasona ken sibuyas tapno saan dagitoy a madadael.
