LAOAG CITY – Nagreklamo ti sumagmamano a mannalon iti ili a Sarrat ditoy Bombo Radyo Laoag gapu ti talbog a cheke nga inpaay ti nanggatang iti inlako da a bawang.
Segun kenni Mr. Noel Calingangan, mangidadaulo ti manalon iti Brgy. Binaratan iti nasao nga ili, nasurok 200 ribo a pisos ti balur dagiti bawang nga inlako da iti Biyeba.
Kuna na nga inlako da dagiti bawang da idi tawen 2015 ken nangipaay ti Biyeba ti cheke nga addaan ti tawen 2017 a petsa a pinangclaim da ti bayad.
Inbatad ni Calingangan nga idi ipasukat da ti cheke ket maysa laeng ti addaan ti pundo idinto a dagiti tallo a cheke ket talbog.
Kuna na nga agbalur ti saglilima pulo a ribo a pisos dagiti nasao a cheke ken adda pay ti saan a naicheke a gatad.
Innayon ni Calingangan a saan laeng nga isuda nga assosasyon ti addaan iti kastoy a problema ngem ketdi iti sabali pay nga ili.
