LAOAG CITY – Inpakaammo ni PMaj. Joseph Tayaban, Hepe ti Philippine National Police iti ili ti Badoc a nakikoordinar dan iti Municipal Treasury Office iti nasao nga ili nga idadauloan ni Mr. Zaldy Mendoza pakaseknan iti maipagarup a panagwaras ti peke a kuarta.
Segun kenni Tayaban, basar iti imbestigasion ket nakaawat ti Municipal Treasury Office iti ili ti Badoc ti mapagat-atapan a peke a 1000 peso bill a posible a nausar kas pinangbayad para iti taxes ken saan da a dagus a naripar.
Ilawlawag ni Tayaban nga idi napan nagideposito ti koleksion iti taxes ti mangidadaulo ti Municipal Treasury Office iti Land Bank of the Philippines ditoy Siudad ti Laoag ket nadlaw ti bangko a maysa a pidaso a 1000 peso bill a mapagat-atapan a peke.
Inbatadna a gapu iti daytoy ket ipakita ti Land Bank of the Philippines ti kuarta tapno ikumpirmar no peke wenno saan daytoy.
Mainaig iti daytoy, binalakaan na a kitaen a naimbag dagiti aw-awaten a kuarta tapno maliklikan ti panagbalin a biktima ti peke a kuarta nga agraira kadagitoy a gundaway.
Immun-una ngem iti daytoy, minandar ni PCol. Julius Suriben dagiti amin nga Hepe iti nagdaduma a kuerpo ti pulisia ditoy probinsia pakairamanan ti Provincial CIDG pakaseknan iti daytoy a banag.
