LAOAG CITY – Saan a tubeng ti kinarigat iti panagbiag tapno saan a maragpat ti arapaap ti biag.
Daytoy ti napaneknekan ni Mrs. Marjorie Felipe, Head Teacher III iti Mandaloque ken Bagut Elem School iti ili ti Dingras.
Iti Success Story a maysa a segment iti programa a Good Morning Philippines, nagbalin nga emosyonal ni Felipe kabayatan ti panangiburay na dagiti nagbalin a kapadasan na sakbay a nagbalin a naan-anay a maysa a mangisursuro.
Inlawlawag a kabayatan ti panagadal na ket ado a rigat ti napasaran ti pamilya da rason nga inkagumaan na ti nangtulong iti ina na gapu ta isuna ti inauna kadakuada nga agkakabsat.
Kuna na nga imbes a sumuko kadagiti gundaway a makapaspasar da ti nakaro a kinarigat ket ad-adda ketdi a nagpursige ken isu ti nagbalin nga inspirasyon na tapno makaturpos iti panagadal.
Maragsakan ni Felipe gapu ta babaen ti panagtitinnulong da a sangapamilya ket nakaturpos da amin kadagiti kakabsat na iti kolehiyo.
Inbalakad ni Felipe a masapol a no adda ti tartarigagayan a tun-oyen ket masapol a buyugen ti aramid ken panagkararag iti Diyos.
