LAOAG CITY – Mapatta-patta nga umabot iti P31.9-M ti gatad ti nadadael iti benneg ti agrikultura ditoy probinsia ti Ilocos Norte gapu iti nagtipon nga epekto ti Bagyo Kristine ken Bagyo Leon.
Daytoy ti inpakaammo ni Mr. Adreanne Pagsolingan, Information Officer II iti Office of the Civil Defense Region 1 no sadinno dagiti kangrunaan a nadadael a produkto ket ti pagay, mais ken pakairamanan ti livestock ken poultry.
Segun kenkuana, umabot met iti P162.8-M ti nadadael iti benneg ti agrikultura iti intero a rehion uno.
Mainaig iti daytoy, umabot met iti 44 a pamilia ti naibakwit babaen iti pre-emptive evacuation manipud iti ili ti San Nicolas, Banna ken Pagudpud kas panagsagana ti agbalin nga epekto ti bagyo.
Nupay kasta, iti agadama ket awan met dagiti nairekord a nalayos ken panagreggaay ti daga, ket mabalin met a dumaliasat kadagiti main roads.
Innayonna nga agtultuloy ti pangipaay dagiti ahensia kadagiti aid ken food packs para kadagiti apektado a pamilia ken nakasaganada a mangipaay iti kanayonan a suporta no kasapulan.
Kabayatanna, nakasagana met nga agresponde ti National Disaster Risk Reduction and Management Council Region 1 kadagiti residente nga agkasapulan iti tulong.
Nagpalagip ni Pagsolingan kadagiti mangalap a saan pay laeng a mapan agkalkalap gapu iti pangta ti Bagyo Leon.
