LAOAG CITY – Mapmapnon dagiti quarantine facilities a pakaipanan kadagiti nagpositibo a pasyente ditoy probinsya.
Daytoy ti inbatad ni Dr. Rina Corpuz, mangidadaulo kadagiti quarantine facilities ditoy Ilocos Norte.
Segun kenni Corpuz, gapo iti panagtultuloy ti panagngtao ti kaso ti covid-19 ket mapmapnon dagiti isolation facilities no sadinno a kangrunaan kadagiti pasyente a balod ket naka-isolate iti Ilocos Norte Provincial Jail (INPJ).
Inlawlawag na a 63 laeng ti maakumudar a kumpirmado a kaso iti Takuat Training Center idinto a 21 laeng iti DPWH quarantine facility.
Gapo iti daytoy, nakiddaw iti lokal a gobierno ti ciudad ti Laoag ti ABC building kas nayun a pasilidad para kadagiti kumpirmado a kaso ti covid.
Iti agdama ket maiyur-uray pay laeng ti resulta ti swab test dagiti nasurok 500 a dimmalan iti mass swab testing.
Mangnamnama ni Dr. Corpuz a saanen a manayunan pay ti kaso ti covid-19 ditoy probinsya.
