LAOAG CITY – Agtultuloy pay laeng ti panangbirok dagiti kameng ti Coast Guard ken Municipal Disaster Risk Reduction and Manangement Council iti ili ti Pasuquin ti mapukpukaw a mangalap.
Nabigbig daytoy a ni Alvin Mabini Plasos, agtawen ti 23 a residente iti Sitio Diriqui iti Barangay Davila.
Segun kenni Barangay Captain Elviro Agoo iti Barangay Davila iti ili ti Pasuquin, parbangon iti Agosto 2 ti simmalog dagiti uppat a mangalap iti paset ti ili ti Burgos.
Kunana a saan na nga ammo a simmalog dagitoy iti baybay ken naamoan na laeng idi nagreport ti agtagikua iti bilog gapo ta saan da a mapasangpet ti nasao a mangalap.
Inbatad na a nagkakadua dagiti mangalap a napan ngem rumrumuar a nakisina ni Plasos agingga a saan dan a mabirukan.
Mainaig iti daytoy, kunana nga idi kalman ket adda pay dagiti residente a nagturong iti Cagayan ken iti Calayan Island tapno agbirok iti nadakamat a mangalap ngem napaay dagitoy.
Kinumpirmaran na pay a nakita na a naka-online ti account ni Plasos ngem agpukpukaw ti signal isut gapo na a patien da nga adda daytoy iti bangka na ken posible a sumursurot iti ayos ti danom.
Mangnamnama met ni Agoo nga iti kabiitan a panawen ket mabirukan dan ti nasao a mangalap.
